(دهانات الدوكو )

دهانات الدوكو :

بدايه هانتكلم الاول عن شغل الموبيليا والنجاره وطبعا الشغل فيهم مختلف كليا عن الحوائط ويجب مراعاه ان النجاره او الموبيليا دائما معرضه للاحتكاك والصدمات وبالتالى كل ما كان طبقه المعجون اقل كلما زاد العمر الافتراضى للدهان ومعجون النجاره دائما يسحب على الصامت ولا داعى للتربيات بدون داعى.علشان كده لازم يكون من ضمن العده مبرد خشابى ولو امكن صاروخ سنفره وخاصه للابواب الموسكى  نقطه تانى مهمه مش كل خشب ينفع يدهن دوكو كمثال فى الموبيليا الكونتر الحور او الكونتر المصرى بسبب سوء السطح وكثره المطبات والتعريجات فيه (طبعا مش هايمنع انه يقبل الدهان لكن النتيجه لن تكون مرضيه ) نقطه تانيه وهى الابواب الموسكى  السوقى وخاصه الابواب ذات الحشوات هاتكون متعبه جدا فى شغلها خصوصا ان الدوكو كل شغل السنفره فيه بالمياه لان معرض ان الفواصل تنمل وانت شغال والمياه توصل للخشب وتبقى مشكله. 

-طبعا الدوكو كدهان يمتاز بالصلابه واللامعه العاليه وقوه تحمل الظروف الجويه ومقاوم للاصفرار ومقاوم للاحتكاك نسبيا بالنسبه للاكيه. كما يمتاز بالوانه الزاهيه. 

- التأسيس:  اول حاجه بنضف الشغل واتعامل مع اى زيادات فى الخشب باستخدام المبرد او الصاروخ او الصنفره الخشنه. وبعد تطهير الخشب ابدا مرحله المعجون (طبعا فيه صنايعيه بتعزل الخشب قبل المعجون بس انا هنا هاتكلم عن طريقتى الخاصه ) 

- هناك اكتر من نوع معجون للتأسيس ومافيش حاجه اسمها ايه احسن معجونه للتأسيس ( والكلام ده بينطبق على تاسيس الدوكو واللاكيه) بمعنى ان نوع الخشب هو اللى بيحدد نوع المعجون على سبيل المثال ممكن تكون المعجونه الفرنساوى (الورنيش ) ممتازه للكونتر الطبيعى لكن بتبقى رخمه اوى لو هاتسحب بيها على كونتر MDF او موسكى وفى النوعين دول انا بفضل معجونه الزيت  ومعجونه الزيت للاخشاب تركيبها غير معجونه زيت الحوائط صحيح نفس المكونات لكن بنراعى ان الزيت يكون نسبته اقل والغراء يكون اتقل. (ومابفضلش معجونه السينيتون او اللاكيه فى شغل الدوكو )

وبعد تجهيز المعجونه بكفى الشغل معجون يعنى مافيش حاجه اسمها لازم 2 سكينه او 3 او 1 الشغل هو اللى بيحكم عليك عدد مرات السحب وطبعا كل ما كان معجونك مكفى الشغل هايريحك فى الخطوات التاليه.ده بالنسبه للخشب العدل لكن لو الشغل فيه حليات او اويما(او برور الحلق مثلا ) دول ليهم معجونه مخصوص معجونه الجبس او البيجو ودى عباره عن سيبداج وغراء حمص وزنك وبنخليها خفيفه زى الدهان وبندهن الحلايا او الاويما بالفرشه مره واتنين واكتر لو محتاجه وطبعا بيتخلل الاوجه دى سنفره للتنعيم وكل مايكون المشط (مقطوط )يكون افضل وممكن انعم بقطعه قماش متنديه مياه فى حاله الاويما اللى فيها مزانق كتير. 

بعد سنفره المعجون بتبدا اول مراحل الدهان وهى العزل لو معجونه زيت يفضل عزلها بالجمالاكه خاصه لو نسبه الزيت كتيره فى المعجون اما باقى انواع المعجون يتم عزله بالسيلر النارى عن طريق الرش او الاسطوبين (لو معجونه الزيت نسبه الزيت فيها بسيطه ممكن تتعزل بسيلر ولكن عن طريق الرش فقط لان ممكن التنر يحل المعجونه وانت بتدهنها بالقطنه).

بعد تنعيم العزل بسنفره ناعمه يتم رش الشغل بوجهين او اكتر حسب حاله الشغل بالفيلر 

وفائده وجه  الفيلر هو عمل طبقه  (مخده حنينه ) للدوكو لان كما ذكرنا ان الدوكو شديد الصلابه وبدون الفيلر اى خبطه ممكن تخلى الدوكو يتقشر بسهوله وكمان بيملى اثار تجاريح الصنفره الجافه المستخدمه فى المعجون

طبعا بعد العزل والفيلر كده استخدام السنفره بيبقى سنفره دوكو ومياه فى بعض الاخوه الافاضل بيلقط فوق الفيلر لكن انا بفضل رش وش بطانه الاول والتلقيط عليه وده لان التلقيط علىالفيلر ممكن لما تيجى تسنفره بالمياه يكشف معاك الخشب وتبقى مشكله. التلقيط بيكون بمعجونه دوكو للعيوب الصغيره والاستوك للعيوب الكبيره. وماينفعش ارش دوكو فوق الاستوك مباشره لازم بعد سحقه بالسنفره والمياه اغطيه بمعجون دوكو والافضل اظفره على قده بالفيلر او البطانه(معجونه الاستوك تبقع معاك فى اللون الابيض والغوامق وهاتخليك تحس كأن المعجونه خسه ) 

بعد سحق المعجون بسنفره دوكو مناسبه ومياه بجفف الشغل جيدا وازيل اى اثر لتجيير السنفره بقطعه قماش نظيفه وابدا ارش الدوكو كالاتى :اول وجه يكون تقيل نسبيا ثم وجه اخف منه ثم وجه اخف وذلك للتنعيم وسهوله الغسيل وده بالنسبه للدوكو العادىاما الفرن  فيفضل ان يكون الرش فى كابينه او على الاقل مكان جاف وبعيدا عن الاتربه. بالنسبه للدوكو البلدى بعد رش ال3 اوجه وبعد جفافه يتم سحقه بسنفره 1000 ومياه حتى تضيع حبايه الرش ثم استعاده اللمعه بدعكه بالكمباوند الاول ثم البولش. كما يمكن رش وجه او وجهين ورنيش دوكو لامع او مط حسب الرغبه بعد سحقه بديلا عن الكمباوند والبولش. 

اسف للاطاله وطبعا دى طريقتى الخاصه بيا وطبعا كل الاحترام لكل الناس اللى ليها طريقه مختلفه. 

اتمنى من الله ان اكون وفقت وتحت امركم فى اى استفسار او اضافه ليستفاد الجميع. تحياتى 

وليد طه