( دهانات الشروزيت )

دهانات الشروزيت :
طريقه دهان مميزه تظهر ثمره الخشب بلون مختلف لها اكثر من طريقه ولكن فى النهايه الفكره واحده.
تطبق على انواع اخشاب معينه وهى الارو. البلوط. العزيزى. الموسكى ( يجب ان يكون ذو ثمره واضحه )  والعزيزى والموسكى لهم طريقه شغل مختلفه تماما لذلك سنتحدث عنهم فى بوست على حده. ونخص هذا البوست للارو والبلوط وطريقه شغلهم واحده والاختلاف فى شكل الثمره فقط.
انواع التشطيب :
(1)- الاستر. ( للتصميمات الكلاسيك )
(2) -الدوكو (للتصميمات المودرن )
                   اولا :الاستر
*فكره الشروزيت هى ببساطه ان الشغل يتخدم ويتلون وسمره الخشب ماتزال مفتحه *
البدايه تجهيز الشغل من سنفره وخلافه والاهتمام جديا بالسنفره ثم البطانه ويفضل بطانه الحصى (لزهوه الوانها ) ويجب الاهتمام بدرجه اللون جديا حتى لا احتاج للتلوين بعد الخدمه (طبعا مايمنعش انى ممكن الون بعد الخدمه لكن هادخل فى متاهات لا داعى لها )
بعد البطانة اخدم الشغل بوشين سيلر باستخدام الاسطبين (القطنه ويفضل القطن الطبى لانه ماص ) وتتم الخدمه على القاسى ويفضل ان يكون السيلر تقيل نوعا ما حتى لا تمتلئ مسام القشره. ثم تتم مرحله تلوين السمره عن طريق سحب القشره معجونه استر باللون المطلوب ويجب ان تكون المعجونه سايحه نوعا ما لتمتلىء بها سمره الخشب وبعد جفاف المعجونه تتم سنفرتها (يفضل سنفره دوكو ناعمه ) ويتم سنفره المعجون الزائد تماما ثم اعطاء الشغل وجه سيلر خفيف والتشييك على المعجونه لو فيه جزء من السمره لم يتم ملئه بالمعجون ثم اعطاء وجه سيلر اخر.
ملاحظ من طريقه الشغل ان مش السمره بس هى اللى هاتتملى معجون ولكن عيوب الخشب ايضا مما يؤثر على الشكل الجمالى فى النهايه لذلك الخطوه القادمه مهمه جدا وهى علاج المعجون الموجود فى الفواصل او عيوب الخشب بطريقتين الاولى التشميط وهى انى الون المعجونه بقلم مستريك بلون الخشب لو امكن او بمسمار وافتح مكان المعجون وتلقط  على قدها بمعجونه لون الخشب. بعد الانتهاء يتم تكمله خدمه السيلر حتى الاكتفاء ثم التشطيب بخامات التشطيب ( ورنيش دوكو او مجموعه زجاجيه ) ولا يفضل الورنيش الزيتى.
** نقاط مهمه يجب مراعتها :
- لايتم شغل معجون نهائى قبل سحب القشره
- لايفضل رش السيلر لانه ممكن مسام  القشره تتملى.
- لايفضل استخدام الجملكه (سؤال للفنانين )
- من الممكن دهان القشره على لونها وفى الحاله دى الون معجونه السحب بلون غامق عموما الشروزيت محتاج خيال والنتيجه بتكون روعه.
                ثانيا :الدوكو
نضافه القشره (سنفره جيده. ازاله زيادات الخشب ) إعطاء القشره وجهين سيلر كما ذكرنا سابقا ثم رش وجه او وجهين دوكو باللون المطلوب (رش بدون تحميل ) ثم مرحله تلوين السمره وهى طريقتان :
1 - سحب القشره معجونه استر باللون المطلوب (يمكن اضافه القليل من الزنك لسهوله سحبها ) ثم سنفرتها بسنفره دوكو ناعمه (بدون ماء) ثم رش الشغل ورنيش دوكو.
2 - تلوين السمره باللاكيه : سحب الشغل بلاكيه متلون اللون المطلوب بصلبه ومسح الزيادات بقطعه قماشه بطريقه فنيه من غير ما امسح اللاكيه من السمره ( يفضل إعطاء وجه او اتنين ورنيش دوكو بدون تحميل ودعكهم كمباوند وبولش قبل التلوين لسهوله مسح اللاكيه )
كما يمكن دعكه بالكمباوند بعد جفافه لازاله اى اثر للاكيه على السطح ولكن بمهاره بدون مسح اللاكيه من السمره.
اتمنى من الله ان اكون وفقت وتحت امركم فى استفسار.
(وليد طه )