(دهانات الاستر )

دهانات الاستر :
اول واهم خطوه تجهيز السطح جيدا وتنعيمه بالسنفره ومعالجه اى زيادات فى الخشب وتنظيف الخشب من اى غراء زائد بواسطه ازميل ثم تنفيض الشغل من الاتربه والدخول فى مرحله اللون (لو الشغل محتاج تلوين )
انواع بطانات الاستر :
1- بطانه اكاسيد :عباره عن اكاسيد يتم غليها فى الماء.
* تمتاز بطبيعيه الونها وتفضل للخشب العزيزى والموسكى لانها بتظهر السمره جيدا.
2 -بطانات الحصى : عباره عن الوان حصى يتم غليها فى الماء.
* تمتاز بتعدد وزهوه الوانها تفضل للقشره وخشب الزان والارو والبلوط.
3- بطانه الزيت : عباره عن زيت مغلى واكاسيد وقليل من النفط.
* تستخدم للخشب الموسكى والعزيزى فقط فى شغل الشروزيت (إن شاء الله يكون فى بوست لشرح شغل الشروزيت على حده )
4 - بطانه اللاكيه : عباره عن لاكيه الوان ويتم تخفيفه لدرجه مناسبه.
* تمتاز بمرونتها الفائقه وروحها طويله وتفضل لخشب الموسكى والعزيزى لانها بتظهر السمره اكتر من اى بطانه سابقه ويجب ان تترك يوما كاملا للجفاف
5 - الصبغات الجاهزه : تخفف بالماء
* تمتاز بالوانها الجاهزه وصبغيتها العاليه علشان كده مابفضلهاش فى البطانه ( راى شخصى).
بعد اختيار وتجهيز البطانه ابدا بصبغ الخشب  بتغريق الخشب بالصبغه (يفضل سفنجه ومشط للحليات والمزانق ) وتوزيعها جيدا ثم بقطعه قماش جافه واجفف الشغل فى اتجاه سمره الخشب.
*نقاط مهمه بالنسبه للبطانه : مهما كانت حرفيه الفنى لازم اعمل عينه للبطانه الاول على قطعه خشب (مش على الشغل )وتكون نفس نوع الخشب.
_ فيه فرق بين تفتيح اللون وتخفيف اللون. تفتيح اللون يكون باضافه لون فاتح للبطانه انما تخفيف البطانه هو تقليل كميه تركيز الالوان فيها وده بيكون بتذويدها ماء للبطانات المائيه ونفط للزيتيه.
- يجب مراجعه الشغل بعد تنزيله من على البنك وش وضهر خصوصا الابواب ذات الحشوات او الحلايا لانها بتخزن بطانه وهاتسيل عند توقيف الشغل.
بعد جفاف البطانه تاتى مرحله تثبيت البطانه وهى وجه او اتنين من خامه الخدمه اللى هاشتغل بيها وهى كالاتى :
1 - الجملكه : نوع ابيض ويدوب فى سبرتو ابيض وتستخدم لخدمه الشغل الابيض او المدهون على لونه (بعد حرقه بالاوكسجين والنشادر ) وجملكه حمرا تدوب فى سبرتو احمر للشغل الملون.
والخدمه بيها تكون إعطاء عده اوجه كافيه وتسيحها فى النهايه بالخفاف والسبرتو ولكنها خطوه محتاجه حرفيه ومهاره عاليه.
2 - السيلر : دهان سيليولوزى مالئ للمسام يخف بالتنر ويتم دهانه بالقطنه او بالفرشاه او الرش بعده اوجه يتخللها سنفره للتنعيم عند الحاجه.
بعد تثبيت البطانه تاتى مرحله المعجون
فى صنايعيه بتحب تمعجن قبل البطانه عموما فى الاستر (اللى تغلب بيه العب بيه ) بفضل المعجون بعد وشين جملكه او سيلر ومعجونه الاستر عباره عن (غراء. مياه. سبداج )والتلوين باكاسيد. تلون المعجونه لون قريب من الشغل ويجب الاخذ فى الاعتبار خامه الخدمه (السيلر يفتح المعجونه شويه والجملكه تغمقها شويه ) اهم حاجه ان المعجونه لونها مايطلعش اغمق من الشغل يااما نفس اللون او افتح شويه. بعد تلقيط المعجون وجفافه يتم سنفرته لازاله الزيادات ثم ينفض الشغل من تراب المعجون وتكمل مرحله الخدمه سواء سيلر او جملكه حتى تمتلئ مسام الخشب ويصبح عندى سطح متجانس وناعم. بعد الانتهاء من الخدمه يتم التشييك على المعجون بالنسبه للون (تشميط ) فى حاله لو المعجونه لونها افتح من الشغل بقلم مستريك صغير ولون بجملكه والون المعجونه وامسح بصباعى بخفه.
فى حاله لو الشغل محتاج تلوين بعد الخدمه يتم تلوينه بجملكه ملونه او بسيلر وده الافضل وتلوين السيلر بيكون باستخدام الصبغات الجاهزه وارش الشغل حتى اصل للدرجه المطلوبه.
بعد الانتهاء من التلوين تبدا مرحله التشطيب وخامات التشطيب كالاتى :
1 - ورنيش زيتى مط او لامع : منتج زيتى يخف بنوع جيد من النفط ويمكن دهانه بالفرشاه او الرش.
2 - ورنيش دوكو مط او لامع : منتج سيليولوزى يخف بالتنر ويتم رش الشغل وبعد جفافه يلمع بكمباوند وبولش (يمكن غسله بسنفره دوكو وماء قبل التلميع لو هناك حاجه لذلك )
3 - مجموعه زجاجيه : من عائله البوليسترات تاتى بالمصلب والمخفف تمتاز بإعطاء الشغل سطح صلب مقاوم للعوامل الجويه والاحتكاك.
طبعا عالم الاستر عباره عن متاهه ونادر ماتجد فنى بيشتغل زى الاخر. انا اختصرت كتير لطول الموضوع وتحت امركم فى اى استفسار خاص باى مرحله واتمنى من الله ان اكون وفقت.
(وليد طه )